史浩克04上盤奪「堡」

史浩克04上盤奪「堡」 
 
德甲周五獨腳戲，改由迪馬堤奧執教嘅史浩克04逐漸有起色，所以今晚喺主場迎戰奧格斯堡，贏波絕對係意料之內，因為奧格斯堡傷兵滿營，史浩克讓平手、半球穩如泰山，上盤真係熱得有道理。（周五17，有線61及201台周六3:30am直播）

史浩克上場作客僅負利華古遜0:1，但較早前就分別喺歐聯贏士砵亭4:3，同埋喺德甲贏哈化柏林2:0，表現其實唔失禮，最重要係亨特拉爾、祖普莫亭同埋奧保基等攻擊球員狀態唔錯，故即使秘魯翼鋒法芬仍然喺度長期養傷，都唔會影響到史浩克嘅數胡能力，另外幾位傷兵好似菲臘比辛坦拿、哥拉辛拿斯、哥列斯卡同埋後備門將基爾化，都係養傷咗一大段時間，其實對於球隊嘅部署同排陣影響唔大。
自從迪馬堤奧呢位前車路士名帥走馬上任之後，史浩克嘅成績已經冇咁飄忽，同季初嘅海鮮波形象有極大反差，今晚喺主場出擊，自然又係搶分時間，俾多啲時間迪馬堤奧，效果相信會更好。

奧格斯堡傷兵滿營

奧格斯堡上周雖然以2:0擊敗弗賴堡，但球隊早前分別以1:2負緬恩斯，同埋0:1不敵禾夫斯堡，整體表現計落都係麻麻哋，最麻煩係球隊目前傷兵好多，朗尼菲臘、馬高舒卓斯特、馬素迪莊、摩達斯、杜米歷連赫特、基利奧斯、米克烏迪同埋莫拉域克都要養傷，而主將華拿更加要坐波監，個陣容殘到咁嘅地步，試問點會有能力令到主隊失分？何況史浩克04今晚只係少讓平手、半球，雖然賠率係熱啲，但贏面壓一，唔買就走「堡」喇！