烏拉圭「加」注買讓主

烏拉圭「加」注買讓主
 
潮流興用少帥，不過今次哥斯達黎加可能會玩出禍嘞，尤其係佢哋今次仲要作客有「哨牙蘇」蘇亞雷斯領軍嘅烏拉圭，左計右計都冇乜可能爆冷，既然極有可能會大敗一場，咁就更加冇理由唔捧「讓主」。（周四2，香港時間周五7:00am開賽）
兩隊波都喺今屆世界盃亮過相，其中哥斯達黎加仲創出國內紀錄打入8強，而烏拉圭去到16強就行人止步，不過千祈唔好以世界盃嘅成績論成敗，事關作客嘅哥斯達黎加有唔少內部問題！好似主力祖爾甘保返到去阿仙奴之後苦無出場機會，仲有幾多狀態真係好成疑問，而另一好波之人拜仁雷斯亦未必會喺友賽博到咁盡，其餘外流球員未有歸隊搞到唔太齊腳。不過以上都係小問題，最致命嘅就係前教頭佐治路爾斯賓度宣布離隊之後，暫時頂佢嘅竟然係前曼城前鋒雲祖柏，呢位少帥過去全無執教經驗，睇見踢慣穩守突擊嘅哥斯達黎加喺世界盃之後對住巴拿馬、危地馬拉，甚至係魚腩阿曼都有失波就知道佢冇乜料到。
撞正烏拉圭嘅「哨牙蘇」餓波太耐要用比賽谷吓狀態，而侯城前鋒艾保靴南迪斯亦要爭上位，遇到後防有問題嘅哥斯達黎加點都會有球波喺手，話唔定會開埋「讓主」賀吓教練泰巴尼斯再度續約。