阿仙奴「宮」城開上盤

阿仙奴「宮」城開上盤

農曆年後第一次同各位讀者見面，費格然喺度先祝各位波運亨通！今晚英超戲碼一般，其中水晶宮主場對阿仙奴已經算係大戰；無疑水晶宮近排表現係有改善，但阿仙奴氣勢實在太強，作客讓到半一都可照樣捧場。（周六14，now623台周六11:00pm直播）

講真，費格然都唔知阿仙奴係咪真係全面復甦，但喺買波角度，佢哋一日未見回落未繼續捧住先囉；事實兵工廠2015年踢咗9場波，結果攞到7勝2負成績，僅輸俾修咸頓同熱刺兩支前列球隊，但同時贏過曼城，前線幾位快馬喺雲格轉打防反下即時大顯身價；陣容方面，阿仙奴冇錯係有幾件傷兵，但藍斯、張伯倫同阿迪達其實都唔係無可取代，最緊要係阿歷斯山齊士已經傷好可以候命，中鋒基奧特近排腳風亦夠順，只要發揮正常，要喺呢場倫敦打吡再攞3分唔難。

水晶宮缺積甸拿克

水晶宮喺柏祖走馬上任後演出亦有改善，不過呢股氣勢近期似乎有減弱跡象，近4戰佢哋僅作客贏過李斯特城，更主場輸俾愛華頓同利物浦，證明主場鬥強隊冇優勢；再講，水晶宮依家仍有麥亞瑟同隊長積甸拿克兩名中場核心受傷，要威脅兵工廠難矣。