德國盃8強有場「大」戰上演,利華古遜喺主場對拜仁慕尼黑,有條件合演入球騷,首先利華古遜近排火力回升,其次拜仁喺「國家打吡」以1:0搞掂多蒙特後,被球迷鬧鬼話佢哋悶到嘔,睇怕係時候整場入波show氹番班粉絲喇!(TVB13
德國盃8強有場「大」戰上演,利華古遜喺主場對拜仁慕尼黑,有條件合演入球騷,首先利華古遜近排火力回升,其次拜仁喺「國家打吡」以1:0搞掂多蒙特後,被球迷鬧鬼話佢哋悶到嘔,睇怕係時候整場入波show氹番班粉絲喇!
(TVB13台周四凌晨2:30直播)
利華傑斯寧回勇
利華古遜喺歐聯被馬德里體育會淘汰後,返到聯賽連贏史浩克04同漢堡反彈,雖然射手孫興民近況回落,但好彩前鋒傑斯寧及時翻生,大家知啦,其實利華古遜同拜仁曾經鬥到頭崩額裂,敵對關係好深,今次喺德國盃硬撼,肯定唔想衰畀對方睇。
另一方面,拜仁日前以1:0砌低多蒙特,受到兩大王牌洛賓同列貝利養傷影響踢得好消極,被傳媒形容係教練哥迪奧拿上任以來最沉悶比賽,甚至有人覺得拜仁擺大巴,相信佢哋啲球員都好難吞得落呢啖氣,今場唔同利華古遜鬥攻勢係假。
仲有呀,拜仁中場舒韋恩史迪加對多蒙特受傷後,據講會堅持上陣搏殺,證明拜仁好重視呢場比賽,而且西班牙《每日體育報》大爆,最近拜仁準備出手招攬皇家馬德里中堅沙治奧拉莫斯,如果要氹佢過檔,梗係要踢得好好睇睇造起個勢啦!