巴塞隆拿五福臨「門」

巴塞隆拿五福臨「門」 

一場表面上可能極有睇頭嘅賽事，會唔會變成一場一面倒嘅比賽？歐聯8強戰首回合，巴塞呢個回合雖然先作客巴黎，不過主隊今場陣容天殘地缺，前中後三線盡缺主力，而且分組賽贏波完全係安歷基排錯陣所致，完全唔可以用作參考，如果巴塞今場真係趁佢病攞佢命，肯定會由頭攻到尾望攞多幾個作客入球，大勝一場完全唔係冇可能。（周三4，有線61、64、201及204台周四2:45am直播）

巴黎聖日耳門好歹都係淘汰車路士晉級，點解睇得佢哋咁低呢？首先並唔係話巴黎唔勁，只係對車路士兩回合賽事實在付出太大，幾個球員累積黃牌夠數下，今場「呂布」伊巴謙莫域、華拉堤、奧利亞全部停賽，中堅大衛雷斯大腿受傷肯定缺陣，而莫達亦九成趕唔切上陣，換言之巴黎已經有半隊正選唔出得，當然馬度迪、卡雲尼、拿維斯及堤亞高施華都有力擔大旗，但你對手係巴塞唔係一般球隊，條數隨時係少一個輸多球一啲都唔出奇。

巴塞分組輸波因排錯陣

除咗人腳不整外，基本上巴黎整體實力都唔及巴塞；巴塞喺分組賽遇上巴黎時，作客一役安歷基絕對排錯陣，當其時用上馬菲奧打左閘，呢個後衛一俾佢攻就有上冇落，結果俾咗好多機會盧卡斯摩拉，最終2:3輸波，而之後對皇馬安歷基唔信邪又將馬菲奧放喺左路，結果做就皇馬22連勝，兩次教訓之後，安歷基再唔敢用馬菲奧打左閘，反而近戰馬菲奧打中堅守得穩之餘，更經上常後上建功，攻守得宜嘅巴塞威力更提升一個層次。

丹尼爾停賽影響不大

巴塞喺早前第二循環分組賽，已經成功搵巴黎復仇，而嗰場波都見到兩隊波仍然有級數上差距，唔好以為今戰巴塞作客呢個差距就抵銷到。事實上，安歷基都算係一個實事求是嘅教頭，今季見恩尼斯達狀態唔好，寧願俾佢喺對弱隊時多上陣，上場小白正選下，今場如果輪到復甦嘅沙維披甲，巴塞中場就更穩，而防線上有丹尼爾停賽可能有人擔心，但呢個巴西國腳今季喺場上經常發夢，唔出根本冇壞，今場可能起用巴查或蒙度亞上陣，始終係巴塞青訓點都同聲同氣，前線唔使講，你用6個人都睇唔住MSN組合，而且形勢上只要巴黎一失波，就肯定要焗攻，巴塞打兩三個反擊巴黎可能愈輸愈多，真係可能大手交易架！