加拿大主場「大」無畏 喪攻哥斯達黎加

東道主之一嘅加拿大聽朝喺美洲金盃對哥斯達黎加，終於等到返主場出戰。現時加拿大喺B組包尾，形勢上冇得再守，加上哥斯達黎加都要搶分爭出線，相信會踢得進取啲，扒冷玩2.45倍入球大好過。（開賽時間：周三早上8:30）

哥斯達黎加雙箭英超級數
加拿大以0:1不敵牙買加後，暫時得1分包尾，而且計埋對上2屆賽事，佢哋近8場分組賽全部開入球細，睇得出佢哋質素所限習慣踢守勢波。不過其實加拿大所謂東道主之一嘅身份，頭兩場分組賽都喺美國踢，直到呢場至返多倫多搏殺，照計唔會喺主場球迷面前做衰仔啩？

哥斯達黎加日前被薩爾瓦多逼和1:1，補時2分鐘至失守，連續兩場都有失波，對住加拿大未必可以保持清白。但另一方面，其實哥斯達黎加個陣容都幾堅，淨係前線上嘅祖爾甘保同拜仁雷斯，都已經有英超級數，既然佢哋連和兩場得2分喺手，應該會同加拿大搏過，否則分組賽出局好醜啫！