流浪者拆「機」送禮

贏波做一哥過聖誕新年
今日平安夜只係得1場波玩，由西悉尼流浪者喺主場迎戰紐卡素噴射機。流浪者家陣唔止踢到曉飛咁滯，最重要嘅係只要班波今仗贏波，佢哋唔單止可以澳職一哥身份過聖誕，仲肯定坐穩榜首位置過新年，簡直係送畀球迷嘅最佳雙重禮物，鬥心爆棚下要擊沉頹爆噴射機唔難，撐1.85倍「讓主」。（有線64及203周四下午4:00直播）

流浪者雖然今季開局唔多順利，要踢到第4場先開到齋，點知佢哋其後行運一條龍，一口氣連贏7場直衝上榜首。雖則流浪者嘅連勝走勢喺上仗作客珀斯光輝被中斷，之不過佢哋喺兩度落後嘅情況下，都可以追和對手2:2，證明班波鬥心十足，呢次回師主場依然信得過。

流浪者近期火力猛
更何況佳節當前，流浪者就梗係想入場打氣嘅主場球迷盡興而歸。佢哋呢鋪只要全取3分，就肯定以一哥身份歡度聖誕節同新年，在公在私佢哋點會唔搏先？以流浪者連續7戰每場至少兩度攻破對手大門嘅強勁火力，今日想入多兩粒唔難啫。

噴射機連續7戰不勝
再講吖，對手噴射機已經連續7仗唔識贏，更攞命嘅係佢哋喺最近5場比賽，足足有4仗食白果，夾埋只係入得1粒咁大把，呢鋪佢哋仲可以憑乜搶分呀！加埋守將積臣荷夫曼、李記帝一停一傷，防線唔齊章下今仗想全身而退就更加難咯。