世界盃:墨西哥土炮轟散沙 /Mic 少

喀麥隆一味講錢冇乜Heart
今晚世盃頭場於納塔爾上演A組墨西哥對喀麥隆，昔日天真激情嘅「非洲雄獅」喀麥隆，近年已變成「僱傭兵團」，早前更為獎金問題威脅罷踢，未開波已先自挫銳氣，亦反映球員根本冇國家使命感，戰意唔可靠。墨西哥以本土聯賽球員為骨幹，眾將士為打響名堂，必定使出渾身解數「騷哥利」，配合半個主場之利，小讓平半Mic少捧上盤。

（無綫翡翠台、明珠台、TVB 13、now 818及840周六凌晨零時直播）

非洲球員出身貧困，對金錢睇得特別重；即使効力大球會享有天價薪酬，一樣唔放過任何搵錢機會，話之你世界盃都係錢字行先。以前鋒伊度奧為首嘅國腳，早前又發動工業行動，要求足總增加獎金先至肯飛去巴西。雖然最終達成協議，但已令行程比原定遲咗一日，肯定影響球隊備戰。世界盃水準高，鬥志往往先至係勝負關鍵，喀麥隆球員將個人利益置於整體之上，遇到逆境時恐怕唔會一條心，呢種球隊邊信得過呢！

小豆餓波吼「首球」
對手墨西哥幾乎喺外圍賽出局，慶幸臨尾搵到米基爾靴里拉領軍，驚險殺出重圍。呢位「北美狂人」成功主因係重用一班渴望上位嘅土炮，貪佢哋肯搏肯捱，每場都搏到盡。喺生死之戰墨軍更以全本土聯賽球員踢外圍賽附加賽，最終大勝新西蘭攞到決賽周入場券，證明米帥決定正確。

墨西哥大軍名單之中，外流歐洲聯賽嘅球員唔多，較有名氣只係曼聯射手查維亞靴南迪斯，以及維拉利爾前鋒杜斯山度士。米基爾靴里拉重視整體戰多於個人星味，正好剋死一盤散沙嘅喀麥隆，同時亦唔好忘記墨西哥鄰近巴西，有好多球迷前往打氣，聲勢都贏埋啦！「小豆」查維亞靴南迪斯過去一季喺曼聯長居後備，非常餓波，勢必搶韁全力數胡，佢嘅首名入球有4.5倍，值得跟進。

墨西哥世盃經驗贏晒
墨西哥與喀麥隆對上一次碰頭已經係1993年，當時墨西哥喺中立場小勝一球，但由於事隔已久，球員亦面目全非，可以話只有象徵性作用，但若論參加世盃經驗，則始終以墨西哥較勝一籌。