3前鋒冇人識入波 哥斯達黎加「買」唔過

聽朝美洲金盃B組頭場，哥斯達黎加讓半一制唔過，揀牙買加1.65倍下盤好過。事關哥斯達黎加狀態麻麻，今年踢5場熱身賽只得2和3負，拜仁雷斯同祖爾甘保兩大進攻核心一粒都未入過，就連最富經驗嘅老牌射手沙保里奧都啞晒火，球會連同國家隊賽事已經6場食白果，成條鋒線冇個靠得住，加埋「神龍」基羅拿華斯受傷落選，點捧得落手呀？ （開賽時間：周四早上8:00）

牙買加沿用美洲盃班底
牙買加今次點兵，基本上係沿用早前征戰美洲國家盃嘅班底，中場魯多夫柯士甸、後衞馬里亞柏、韋斯摩根一眾喺英格蘭搵食嘅國腳，仍然都在陣中。係，雖然佢哋喺美洲盃3戰全敗，但對住烏拉圭、巴拉圭同阿根廷3支南美勁旅，查實都只係僅輸一粒，表現已經有晒交代，而且經過呢幾場盃賽磨練，比賽狀態亦較以熱身賽備戰嘅哥斯達黎加更佳，今場要有分落袋，應該唔難吖。