皇馬讓2冇有怕 近7對賽例炒愛斯賓奴

「銀河艦隊」皇家馬德里今晚西甲將喺主場迎戰愛斯賓奴，「銀河艦隊」上場聯賽失分，搞到依家落後兩大死敵巴塞隆拿同馬德里體育會3分，仲比巴塞打多一場，今場再冇失分空間。愛斯賓奴係皇馬嘅私房菜，近7次交手「愛奴」全數落敗，當中包括最近3次均被皇馬大炒3蛋或以上，皇馬今場讓到兩球都照捧讓球主勝！

（now 632周一凌晨3時30分直播）

先後喺主場以5比0同5比1大炒拉科魯尼亞同希杭後，上場作客貝迪斯皇馬新帥施丹未能取得3連勝，呢場亦都係「銀河艦隊」今季第6場作客失分；10場作客賽事只係贏得4場，堂堂一支班霸球隊，咁嘅成績相信球會同球迷都唔收貨囉！不過皇馬主場戰績就好好多，11戰錄得9勝，當中有6場係淨勝對手3球或以上，包括贈貝迪斯5蛋、瘋狂大炒華歷簡奴10比2，相信一眾皇馬球星今場都唔會留手盡情大炒。皇馬今場有加里夫巴利繼續養傷，不過有王牌C朗拿度在陣都夠啦，皇馬對上兩次大炒愛斯賓奴，C朗一共入咗8球，真係當食生菜咁食呀！再加埋狀態唔錯嘅賓施馬搶攻，皇馬火力絕對唔嘢小。

愛軍天殘地缺冇運行
愛斯賓奴上場聯賽逼和維拉利爾2比2，終止4連敗，但預料今場仍然難逃被炒宿命。球隊今季首循環喺主場已經慘吞皇馬6蛋，再對上兩次鬥皇馬亦分別輸1比4同0比3，真係畀「銀河艦隊」恰到上心口，擺到明成為皇馬嘅私房菜！再者，愛斯賓奴今場更有後衞域陀艾華利斯同前鋒謝拉特摩蘭奴坐波監，隊中神射手卡些度亦因傷上陣成疑，陣容天殘地缺，相信愛斯賓奴今場爆冷機會幾乎係零，科娜一於捧1.65倍讓球主勝！